👨💻 Haqqımda
Mən 13 yaşımdan etibarən peşəkar mətbəxdə fəaliyyət göstərirəm və bu sahədə bütün mərhələləri praktiki olaraq keçmişəm. Karyerama qab yuma ilə başlamışam, daha sonra köməkçi aşpaz, aşpaz, sous chef və chef vəzifələrində çalışaraq bu günə qədər davamlı inkişaf etmişəm. Hal-hazırda 25 yaşım var və müxtəlif konseptli restoranlarda fərqli komandalarla işləyərək geniş və real təcrübə qazanmışam.
Fəaliyyətim dövründə milli, Avropa, Koreya, Yapon və İtalyan mətbəxlərində çalışmışam. Bu da mənə fərqli kulinariya yanaşmalarını birləşdirmək və menyulara kreativ yanaşmaq imkanı verib. Eyni zamanda menyu hazırlanması, texnoloji kartların (tex kart) düzgün və sistemli qurulması, məhsul və xammalın optimal istifadəsi (food cost nəzarəti) sahəsində güclü təcrübəyə sahibəm.
Komanda idarəetməsi mənim əsas güclü tərəflərimdən biridir. Müxtəlif dövrlərdə 5 nəfərdən 25 nəfərə qədər heyətə rəhbərlik etmişəm, həm gündüz, həm də gecə növbələrinin koordinasiyasını təşkil etmişəm. İş bölgüsünün düzgün qurulması, intizamın qorunması və mətbəxdə stabil nəticənin təmin olunması üçün sistemli yanaşma tətbiq edirəm.
Mənim üçün aşpazlıq yalnız yemək bişirmək deyil — bu, eyni zamanda idarəetmə, planlama və məsuliyyətdir. Məqsədim işlədiyim məkanda keyfiyyət standartını qorumaq, prosesi sistemləşdirmək və ümumi nəticəyə real töhfə verməkdir.
Əgər profilim sizin tələblərinizə uyğundursa, daha ətraflı müzakirə və əməkdaşlıq imkanlarını danışmaq üçün görüşməyə hazıram.
